कैद कट्टामा सत्ता प्रभाव : प्रचण्डकालका ६ सय २० मा थपिए चार सय ९२, गैंडा मार्नेदेखि मान्छे मार्नेसम्मको कैद माफ हुँदै
निरक थापा २०८१ भदौ २० गते २०ः४५
माओवादी केन्द्र, एमाले अनि राष्ट्रिय स्वतन्त्र पार्टीसहितको सरकारले असार १० मा ६ सय २० जनाको कैद कट्टा गर्ने प्रक्रिया अगाडि बढाएको थियो। संविधान दिवस पारेर मन्त्रिपरिषद्बाट बाँकी कैद सजाय मिनाहा हुने गरी उनीहरूलाई छाड्न कारागार व्यवस्था विभाग हुँदै गृह मन्त्रालयमा सूची पुग्यो।
यो बिचमा गठबन्धन बदलिएर माओवादी र रास्वपासहितको दल बाहिरिए। नेपाली कांग्रेससहितका साना दलसहित एमाले अध्यक्ष केपी शर्मा ओलीको नेतृत्वमा सरकार बन्यो। नयाँ सरकार बनेपछि कैद कट्टा हुनेहरूको पनि नयाँ सूची बन्यो। भदौ २३ को मौका छोपेर चार सय ९२ जनाको कैद कट्टा गर्न विभागले सूची समेत सार्वजनिक गरिसकेको छ।
सर्वोच्च अदालतको आदेश अनुसार गुपचुप कैद माफी र मिनाहा गर्न सम्भव छैन अहिले। विभागले कर्तव्य ज्यानसहितका गम्भीर मुद्दामा पीडितको सहमतिसँगै कैद मिनाहा गर्न लागेकाहरूको सूची सार्वजनिक गरेर कतैबाट उजुरी नआएको हकमा मात्रै माफी मिनाहाका लागि गृहमा सिफारिस गर्न सक्छ। विभागको सिफारिस अनुसार मन्त्रिपरिषद्ले निर्णय गरेर बाँकी कैद माफी-मिनाहा हुनसक्छ।विभागले सार्वजनिक गरेको नयाँ सूचीमा ५० प्रतिशत कैद भुक्तान गरेका ४ सय १९, ज्येष्ठ सदस्य २ र घटना भई ४० प्रतिशत कैद भुक्तान भएका ७१ जनाको नाम छ। कैद माफीको सूचीमा रहेकाहरू अधिकांश सवारी ज्यानका दोषी छन् । हत्यासँगै यो पटक वन्यजन्तु अपराधमा दोषी ठहर भएकाहरूको सङ्ख्या धेरै देखिन्छ।
कस्तुरीको बिनाको कारोबारी, गैँडा मारेर खाग बेच्ने, संरक्षित वन्यजन्तु रेडपाण्डा मारेर छाला बेच्नेहरूको सङ्ख्या माफी मिनाहाको सूचीमा टन्नै देखिन्छ।
विभागले भदौ १६ मा सूचना प्रकाशित गरेकाले त्यो सूचीमा २३ भित्रमा कुनै उजुरी नआएको हकमा कैद कट्टाको निर्णय हुनसक्छ। तर त्यही दिन पारेर सरकारले निर्णयको तयारी गरेकाले नयाँ सूचीमा कुनै न कुनै रूपमा राजनीतिक प्रभाव देखिन्छ नै।
Comments
Post a Comment